Sunday's Literature 008

"TEKNOLOHIYA"

Tayo ay masigasig sa pamumuhay

Masisipag sa mga aspeto ng buhay

Dahil ayaw nating mawalan ng saysay

Mga paghihirap ay nais magtagumpay

Ngunit bakit nagkaganito ang mundo?

Kasipaga’y tila din a naging buo

Pamumuhay natin ay parang nalumpo

Ating mga paa’y hindi na makatayo

Teknolohiya: ikaw ba ang sanhi?

Gawain nami’y ginawa mong madali

Kasipagan nami’y iyong ikinubli

Katamaran sa sarili’y namutawi

Iyong mga imbensyon at mga makinarya

Ito’y nakatutulong naman talaga

Lalo na sa mga gawaing mahalaga

Husay mo ay sadyang kaiga-igaya

Subalit epekto’y di naging maganda

Resulta’y nakukuha ng kisapmata

Mga tao’y sayo na lamang nakaasa

Wala ng pagsisikap na nakataya

Bunga nito’y hindi na maiiwasan

Kaya’t tayong mga madla’y dapat umaksyon

Ialis sa sarili ang katamaran

Nang tamang benepisyo’y maaasahan

Sunday's Literature 002

"Saan Patungo Ang Umaga?"

Kapaligirang puno ng kaguluhan

Bayang kapos sa sariling kaligtasan

'Di alam kung saan ang patutunguhan

Dahil lugar mo'y walang kapayapaan

Tulad ng mga batang laki sa lansangan
Pagtatrabaho ang unang nasilayan
Pagka't karununga'y kulang sa isipan
Dahil ba pera ang unang kailangan?

Kayamanan, ito ang tunay na sanhi
May pamilyang sobra-sobra ang salapi,
Mayroon namang wala na pati budhi
Siguro'y masamang gawi ang napili?

Bakit ang kahirapa'y sadyang masaklap
Gobyerno ba natin ay naging maagap?
Adhikain nila ay ipinakalap
Ngunit ang tulong ay kay hirap mahanap

Pagbubuwis ng buhay ay 'di kailangan
Upang tawagin na bayani ng bayan
Bigkis ng pag-asa at kapayapaan
Ito ang daan sa ating kaunlaran

Saan ba patungo ang isang umaga
Kung ang liwanag ay hindi mo makita?
Panalangin ang dapat nating sandigan
Upang pagbabago'y tuluyang makamtan

Sunday's Literature 001

"Si Juan Dela Cruz"

Kaunlaran ang tangi niyang pangarap

Maiahon ang taong lugmok sa hirap

Iwasan ang mga kaguluhang masaklap

Bayan nati'y gawing maayos at tanggap

Simple lang naman pangarap ni Juan

Bansang ito ay bigyan ng katarungan

Maayos na pamamahala sa bayan

Gobyernong tapat at makatotohanan

Ang halalan ay inaabangan niya

Sapagkat pagtakbo mo ay mahalaga

Nais niya'y isabuhay ang plataporma

Hindi ang pansarili mong adyenda

Pagpapasikat mo sa telebisyon

'Di mahalaga pati ang iyong posisyon

Bagkus ang kailangan ay edukasyon

Hindi ang iyong natatanging korapsyon

Termino mo ay gawing makabuluhan

Bigyan ng kasagutan ang kahirapan

Upang gawi ng ating mamamayan

Hindi masayang pati kapaguran

Kumilos ka na at iyo ng simulan

Mga pagbabagong asam ng bayan

Upang manatili ang katahimikan

Dahil ang bayan mo ay bayan rin ni Juan